बारा । बाराको चुरियामाई नजिकै तीर्थयात्री बोकेको बस दुर्घटनामा मृत्यु हुनेको संख्या सात पुगेको छ ।काठमाडौंबाट जनकपुरतर्फ जाँदै गरेको मधेस प्रदेश -०३-००१ ख ७९९४ नम्बरको बस बाराको जितपुर सिमरा उपमहानगपालिका–२२ पूर्वपश्चिम राजमार्गको चुरियामाई नजिक आज बिहान २ बजे दुर्घटना भएको हो । उक्त दुर्घटनामा १९ जना घाइते भएका छन् ।
बस दुर्घटनामा ६ भारतीय नागरिक र एक नेपालीको मृत्यु भएको बारा प्रहरी प्रमुख होबिन्द्र बोगटीले जानकारी दिए । चालकसहित २७ यात्रु चढेको उक्त बस चुरियामाई मन्दिरबाट सय मिटर दक्षिणतर्फको खोलामा खसेको छ । दुर्घटनामा घाइते भएकाहरुको हेटौँडाका विभिन्न अस्पतालमा उपचार भइरहेको प्रहरीले जनाएको छ ।
गाडी दुर्घटना हुनुभन्दा अगाडि चालकले होटेलमा बस रोकेर मादक पदार्थ सेवन गरेको र त्यसपछि गाडी अनियन्त्रित गतिमा चलाएकाले दुर्घटना भएको घाइतेहरुले बताएका छन् ।अधिकांश भारतीय तीर्थयात्री बोकेको बस पशुपतिनाथको दर्शन गरी काठमाडौंबाट जनकपुर जाँदै थियो । तीव्र गतिका कारण दुर्घटना भएको प्रहरीको अनुमान छ ।
