विराटनगर । ग्रिनक्रस हस्पिटलबाट हराएको एक दिनको नवजात शिशु कोशी अस्पतालका पूर्वमेसु तथा स्त्री तथा प्रसूति रोग विशेषज्ञ डाक्टर तपेश्वरलाल कर्णले निःसन्तान दम्पतीलाई बेचेको खुलासा भएको छ । डा. तपेश्वरलाल कर्णले अविवाहित जोडीको सम्बन्धबाट जन्मिएको शिशु (छोरी) निःसन्तान दम्पतीलाई पाँच लाख रुपैयाँमा बिक्री गरेको पुष्टि भएको हो । डाक्टर कर्णले मोरङको कटहरी गाउँपालिका–२ आदर्श टोलकी दिलमाया राजवंशीलाई नवजात शिशु बेचेको पुष्टि भएको मोरङ प्रहरीका प्रवक्ता डिएसपी रञ्जनकुमार दाहालले जानकारी दिए । विवाह भएको एक दशक बितिसक्दा पनि दिलमायाको छोरा सूर्यनारायण राजवंशी दम्पतीको सन्तान भएको थिएन । सन्तान नभएपछि दिलमायाले छोरा बुहारीको लागि डाक्टर कर्णसँग ७ लाखमा नवजात शिशु किनेको प्रहरीको अनुसन्धानबाट खुलेको छ । ‘डाक्टर कर्णले पाँच लाख रुपैयाँ लिएका छन् । दुई लाख रुपैयाँ हस्पिटलमा उपचारमा खर्च भएको दिलमायाले प्रहरीलाई बयानमा बताएकी छन्।
चिकित्सक बिरामीका लागि भगवान समान हुन् । जस्ले मृत्यु शैय्यामा पुगेको ज्यान फिर्ता ल्याएर नयाँ जीवन दिन्छ । तर, पछिल्लो समय चिकित्सकहरु बिरामीको भगवान होइन नाफा कमाउने कालो व्यापारी बनेका छन् । डा. तपेश्वरलाल कर्णको धन्दा सुन्दै आङ सिरिङ्ग हुन्छ । मंगलबार डा. कर्णलाई प्रहरीले पक्राउ गरेपछि उनको कालो धन्दा सतहमा आयो ।विगतदेखि अवैध सम्बन्धबाट जन्मिएका शिशुलाई बिक्री गरेर धन आर्जन गर्दै आएका उनले केही दिनअघि अवैध सम्बन्धबाट जन्मेकी शिशु (छोरी) निःसन्तान दम्पतीलाई ५ लाख रुपैयाँमा बिक्री गरेको चाल पाएपछि प्रहरीले उनीसहित शिशुका अविवाहित बाबु (जस्ले शिशु बेचेका थिए) लाई पक्राउ गरेको छ ।भोजपुर हतुवागढी ४ घर भएका २७ वर्षीय अविवाहित गोविन्द राई र उनकी प्रेमिका २६ वर्षीया युवतीको सम्बन्धबाट जन्मिएको शिशुलाई डा. कर्णले मोरङको काटहरी गाउँपालिका २ आर्दश टोलका सूर्यनारायण राजवंशी दम्पतीलाई ५ लाख रुपैयाँमा बिक्री गरेका थिए । तर, प्रहरीले चाल पाएपछि बच्चा खरिद गर्ने सूर्यनारायण, उनकी पत्नी श्यामवती, आमा दिलमाया र दिदी सुधा राजवंशीलाई पनि प्रहरीले अनुसन्धानका लागि नियन्त्रणमा लिएर राखेको छ ।
असार १४ गते ग्रिनक्रस अस्पतालमा सामान्य रुपमा शिशुको जन्म भएको थियो । त्यहाँका नर्सका अनुसार शिशुको तौल जन्मिदा २ केजी थियो तर, डा. कर्णले शिशुको तौल ९ सय ५० ग्राम मात्र भएको र धरान वा विराट नर्सिङ होममा थप उपचार गर्न लैजाने भन्दै नाम परिवर्तन गराएर बिक्री गरेका थिए ।प्रेमी गोविन्दले उनकी प्रेमिकालाई असार १३ गते ग्रिनक्रस अस्पताल नजिकैको दिपेश मेडिकल क्लिनिकमा डा. कर्णको सल्लाहबमोजिम पुगेका थिए । त्यहाँ लगेर डा. कर्णले युवक र युवती दुवैको नाम र ठेगाना परिवर्तन गराएर क्लिनिककी सहयोगमार्फत अस्पताल भर्ना गराएका थिए । अहिले अस्पतालको रेकर्डमा युवकको नाम मानबहादुर तामाङ र युवतीको नाम फूलकुमारी तामाङ र ठेगाना सुनसरीको रामधुनी ११ भनेर उल्लेख छ । तर, सुनसरीको रामधुनीमा वडा नम्बर ११ नै छैन ।
गर्भवती युवतीलाई अस्पतालमा हुँदा तीनै क्लिनिकबाट डा. कर्णले खटाएकी निरु भनिने निरु यादवले रेखदेख गरेको प्रहरी अनुसन्धान खुलेको छ । अस्पतालका नर्सहरुभन्दा निरु नै बेसी खट्थिन् । औषधि पनि आफै क्लिनिकबाट लिएर आउँथिन् । १४ गते बिहान ८ बजेतिर गर्भवती युवतीको डेलिभरी भयो । निरु आफैँले डेलिभरी गराएकी थिइन् ।डेलिभरीपछि डा. कर्ण अस्पताल आइपुगे । त्यसपछि निरुले शिशुलाई सुधाको हातमा थमाइदिएकी थिइन् । नवजात शिशु लिएर राजवंशी दम्पतीले विराट नर्सिङ होममा लिएर गएका थिए । विराटमा उपचारको क्रममा दुई लाख रुपैयाँ खर्च भएको दिलमायाले बताएकी छन् । नवजात शिशु लिने र बेच्ने डाक्टरलाई अहिले मोरङ प्रहरीमा राखेर अनुसन्धान भइरहेको एसपी दीपक पोखरेलले बताए । ‘डाक्टर कर्णले अरू पनि नवजात शिशु बेचेको घटना आइरहेको छ’ उनले भने, ‘त्यस विषयमा पनि हामीले अनुसन्धान सुरु गरेका छौं । कति नवजात शिशुहरू डाक्टर कर्णले बेचेका छन्, त्यसबारे पनि अनुसन्धान गर्दैछौँ ।’
स्त्री रोग विशेषज्ञ कर्णले त्यसअघि अविवाहित बाबु गोविन्दसँग शिशुको व्यवस्थापनका नाममा ३५ हजार रुपैयाँ लिएको पुष्टि भएको थियो । कोशी अस्पतालमा झण्डै अढाई दशक स्त्री रोग विभागमा काम गरेर सेवा निवृत्त भएका कर्ण २०७० चैत १९ देखि २०७१ असोज १४ गतेसम्म यो अस्पतालको मेडिकल सुपरिन्टेण्डेन्ट समेत थिए । उनी लामो समयदेखि अवैध सम्बन्धबाट जन्मिएका शिशु निःसन्तान दम्पतीलाई बिक्री गर्ने कार्यमा संलग्न हुँदै आएको प्रहरीको अनुसन्धानले पुष्टि गरेको छ । प्रेमी गोविन्दले प्रेमिकालाई असार १३ विराटनगरको ग्रिनक्रस अस्पताल नजिकै रहेको डा. कर्णको निजी दिपेश मेडिकल क्लिनिकमा लिएर आएका थिए । आफ्नो क्लिनिकमा सुरुवाती परीक्षण गरेर कर्णले ती युवक र युवतीको नाम र ठेगना परिवर्तन गरेर क्लिनिक नजिकको ग्रिनक्रस अस्पतालमा भर्ना गरेर असार १४ गते नर्मल अवस्थामा बच्चीको जन्म गराएर त्यसै दिन युवतीलाई बच्चाबिना नै डिस्चार्ज दिएका थिए । अस्पतालको रेकर्डमा गोविन्दको नाम मानबहादुर तामाङ र युवतीको नाम फूलकुमारी तामाङ अनि ठेगाना सुनसरीको रामधुनी ११ उल्लेख छ । जवकि रामधुनीमा वडा ११ नै छैन । अस्पतालका नर्सद्वयका अनुसार डा. कर्णले असार १३ गते साँझ ७ बजे क्लिनिककी सहयोगी निर्मला यादव (निरु) मार्फत ती गर्भवती युवतीलाई अस्पताल पठाएर नाम परिवर्तन गराएर भर्ना गराएका थिए । गर्भवती युवतीलाई अस्पतालमा भर्ना गरेपछि निरुले नै उनलाई ब्यथा लाग्ने औषधि चलाएर आफूहरूलाई निगरानी मात्र गर्न र केही परे वा डेलीभरी हुने स्थिति भएमा आफूलाई जानकारी गर्नु भन्दै हिँडेको अनुसन्धानमा खुलेको छ । १४ गते बिहान सवा ७ बजेतिर युवतीको पाठेघरको मुख खुलेर डेलिभरी हुने अवस्था आएपछि निरुलाई हामीले जानकारी गरायौं,’ ती नर्सले भने, ’त्यसपछि निरु दिदी अस्पताल आएर आफैंले ८ बजेतिर डेलिभरी गराइन् । त्यसपछि डा. कर्ण अस्पताल आइपुगे ।’त्यसपछि निरुले शिशुलाई सुधाको हातमा थमाइदिएकी थिइन् । डा. कर्णले डेलिभरी नोटमा बच्चा (छोरी) नर्मल जन्मिएको, तौल कम ९ सय ५० ग्राम मात्र भएको र धरान वा विराट नर्सिङ होममा थप उपचार गर्न लैजाने भन्दै नाम परिवर्तन गरिएका शिशुका बाबु रामबहादुर तामाङले बच्च बुझेको ब्यहोराको कागज नर्सहरूलाई लेख्न लगाएका थिए । डा. कर्णले प्रेम जोडीलाई बच्चाबिना नै डिस्चार्ज दिएर घर पठाएका थिए । उनीहरुका अनुसार शिशुको तौल सवा दुई किलो थियो । ती दुई नर्सले भने डा. कर्णले आफूहरुलाई बच्चाको तौल ९ सय ५० ग्राम मात्र भएको पत्र लेख्न दबाब दिएको बताएका छन् ।साभार।
