स्थानीय ठाकुरद्वारा निवासी ३१ वर्षीय शिवम् आइसक्रिम, बेकरी तथा कफी सपका सञ्चालक रमेश थापाको अगुवाइमा यो अभियान चलाएको हो। मन्दिर परिसरमा छाडा गाईहरूको व्यवस्थापनका लागि संचालित गौशालामा करिब अहिले करिब पचास बढी गाईहरू रहेका छन्। पछिल्लो समय देश व्यापी रुपमा जनावरमा फैलिएको लम्पी स्किन रोगबाट गौशालामा रहेका गाई पनि अछुतो रहन सकेनन् र गाईको दयनीय अवस्था देखेपछि आफूहरू गाई बचाउ अभियानमा अघि बढेको थापा बताउँछन्।
उनीसँग उनलाई साथ दिन युवाहरूको संख्या थपिँदै गयो र अहिले सामूहिक रुपमा गाईको उचित व्यवस्थापनमा खटिने गरेको थापा बताउँछन्। सुरुवातमा गौशाला सरसफाई र बिरामी गाईहरूको चिकित्सककाे सहयोगमा औषि उपचर गरिएको र उनीहरूलाई आवश्यक खाद्यान्न औषधिको व्यवस्थापन गरिएको छ। अहिले यस क्षेत्रका स्थानीयहरूले युवाहरूको प्रशंसा गर्दै आफ्नो जन्मदिन जस्तो विशेष दिन पारेर गाईका लागी आवश्यक खाद्यान्न सहयोग गरेर मनाउने गरेका छन्।
शनिबार जस्तो बिदाका दिनमा युवाहरू घाँस काट्ने पराल व्यवस्थापन गर्ने जस्ता कार्य गरेर गुड सटडे मनाउने गरेका छन्। यसै क्रममा आजको शनिबार युवाहरूले हरियो घाँसको व्यवस्था गरेका छन्।
ठाकुरबाबा मन्दिर व्यवस्थापन समितिका अध्यक्ष रुद्र खड्काले युवाहरुले निकै उदाहरणीय कार्य गरेको भन्दै उनीहरूको प्रशंसा गरेका छन्। यो सेवा मात्र नभई धर्म पनि कमाएको खड्का बताउँछन्। सबैको हातेमालो र सहयोगले जटिल कार्य पनि सरल हुने भन्दै निःस्वार्थ भावनाले युवाहरूले गरेको कार्यको उच्च मूल्याङ्कन गरेको बताउँछन्।
परम्परागत रूपमा मन्दिरको आम्दानीबाट गाईको पाल पोषण हुँदै आएकोमा हाल मन्दिरको आयस्रोतमा कमी हुनु, चरिचरन क्षत्रको अभाव र दिन प्रतिदिन गाईको सङ्ख्या वृद्धि हुँदै गएको व्यवस्थापनमा कठिन हुँदै गाएको अवस्थामा युवाहरुको यो कार्यले गौशाला व्यवस्थापन थप मद्दत पुगेको अध्यक्ष खड्काले बताए ।
लुम्बिनी प्रदेश
