सशस्त्र प्रहरी बल, नेपाल नं. ३ गढीमाई बाहिनी मुख्यालय मकवानपुर र सशस्त्र प्रहरी बल, नेपाल नं. ५ विन्ध्यवाशिनी बाहिनी मुख्यालय, रुपञ्देहीको ८औं वार्षिकोत्सव कार्यक्रममा प्रमुख अतिथिका रुपमा सहभागी भएका सशस्त्र प्रहरी महानिरीक्षक राजु अर्यालज्यूले अमर सशस्त्र प्रहरीका परिवारसँग भेटघाट गर्दै अमर सशस्त्र प्रहरीका परिवारले दुई छाक खानाका लागि चिन्ता गर्नु नपर्ने बताएर अमर सशस्त्र प्रहरीका परिवारको मन छोए ।
‘दुई छाक खानका लागि अप्ठ्यारो अवस्था आए नजिकैको ब्यारेकबाट राशन-पानी लगेर भए पनि तपाईंहरुको मुहारमा खुशी ल्याउने व्यवस्था मिलाउँछु’ सशस्त्र प्रहरी महानिरीक्षक अर्यालले थपे- ‘अमर शहीद परिवार हुनु दुःखको विषय होइन, बरु त्यस्ता वीर सपुतहरु जन्माएकोमा गर्व गर्नुपर्छ ।’ उनले अमर सशस्त्र प्रहरीका राष्ट्रसेवक कर्मचारीले बगाएको रगतलाई संगठनले कहिल्यै नबिर्सने बताइरहँदा उपस्थित अमर सशस्त्र प्रहरी परिवारका सदस्यहरु भावुकसमेत बनेका थिए । सशस्त्र प्रहरी महानिरीक्षक राजुज्युले दुवै कार्यक्रममा संगठनको नीतिअनुसार अमर सशस्त्र प्रहरीको घरमा हुने वार्षिकी तथा धार्मिक कार्यक्रममा युनिट कमाण्डर वा प्रतिनिधिको अनिवार्य उपस्थिति सुनिश्चित गर्न निर्देशनसमेत दिनुभएका छन् ।
स्थानीय युनिटहरुलाई अमर सशस्त्र प्रहरी शहीद परिवारसँग निरन्तर सम्पर्कमा रहनसमेत निर्देशन दिएका सशस्त्र प्रहरी महानिरीक्षक अर्यालले शहीद परिवारको सम्मानमा चौतारा, पाटी-पौवा, प्रतिक्षालय, धाराजस्ता समाजोपयोगी संरचना निर्माण गर्नसमेत अह्राए । अमर सशस्त्र प्रहरीका परिवारलाई उनको सान्त्वना थियो- ‘देश र जनताका लागि रगत बगाउने सन्तानका परिवार हुनुहुन्छ, त्यसमा हाम्रो उच्च सम्मान छ ।’ उपस्थित अमर सशस्त्र प्रहरीका परिवारले प्रतिक्रिया दिए- ‘आईजीसाब हाम्रो सुख-दुःखमा सधैं साथै हुनुहुन्छ, यसमा हामी खुशी छौं । हाम्रा सन्तानले देश र संगठनका लागि रगत बगाए, तपाईंहरु सबै हाम्रा सन्तानसरह हुनुहुन्छ । निरन्तर सुख-दुःख साट्ने अवसर पाइयोस् । यही हाम्रो कामना छ ।’यसैगरी अवकाशप्राप्त भएका सशस्त्र प्रहरी कर्मचारीहरुलाई पनि त्यस अवसरमा सशस्त्र प्रहरी महानिरीक्षक अर्यालले अवकाशप्राप्त जीवनले अझै पनि राष्ट्रका लागि योगदान दिन सक्ने भएकाले सामाजिक क्षेत्रमा सक्रिय रहेर राष्ट्रका निम्ति थप योगदान दिन आग्रह गरे । उनले भने- ‘समाजमा भएका नकारात्मक पक्षलाई निरुत्साहित गरेर असल समाज निर्माण गर्न पूर्वसुरक्षाकर्मीहरुको भूमिका अझै महत्वपूर्ण हुन्छ ।’ आफ्नो कार्यकालमा संगठनको हितमा संगठनका हरेक सदस्यको मन छुने किसिमले आमूल परिवर्तन ल्याएका सशस्त्र प्रहरी महानिरीक्षक राजु अर्यालले यसअघि बहालवाला सम्पूर्ण सशस्त्र प्रहरी कर्मचारीहरुलाई भर्चुअल माध्यमबाट निर्देशन दिँदै भनेका थिए- ‘असल काम गर्नका लागि मुख्यालयको आदेश पर्खिराख्नु पर्दैन । तर, यदि राष्ट्र-राष्ट्रवासी र संगठनको हितविपरीत कसैले काम गर्छ भने कारबाहीका निम्ति तयार रहनुपर्छ ।
