वीरगञ्ज १५ नुर आलम
भन्सार विभागले यस वर्षको दशैं बिदा सम्बन्धी जारी गरेको सूचनाअनुसार नेपालभरका भन्सार शाखाहरू केवल विजया दशमी (अष्टमीपछिको दशौं दिन) मा मात्र बन्द हुने उल्लेख गरिएको थियो । तर, व्यवहारमा भने महानवमीकै दिन विभिन्न भन्सार शाखा पूर्ण रूपमा सुनसान देखिएका छन् ।
वीरगञ्ज भन्सार कार्यालयसहितका शाखाहरूमा सोमबार बिहानैदेखि सेवा लिन आएका व्यावसायी र सर्वसाधारण कर्मचारी उपस्थित नभएपछि निराश बनेका छन् । सूचनामा स्पष्ट रूपमा “विजया दशमीको दिन मात्र कार्यालय बन्द रहने” भनिए पनि महानवमीको दिनै कार्यालय बन्द हुँदा सेवाग्राहीहरू ठगिएको महसुस गरिरहेका छन् ।
व्यावसायीहरूका अनुसार यसरी पूर्वसूचना विपरीत कार्यालय बन्द हुँदा आयात–निर्यात प्रक्रियामा ढिलाइ हुने, भन्सार महसुल बुझाउन कठिनाइ हुने र ढुवानी व्यवसायमा प्रत्यक्ष असर पर्ने देखिएको छ । दशैंको भीडभाडकै समयमा यसले व्यापारीलाई थप आर्थिक क्षति पु¥याउने उनीहरूको गुनासो छ ।
स्थानीय सेवाग्राही सागिर मियाँ भन्छन्, “विभागले बिदा केवल दशमीमा मात्र भन्ने सूचना दिएको थियो, तर आज महानवमीमै कार्यालय बन्द हुँदा हामी अलमलमा प¥यौं । यो पूर्ण रूपमा गैरजिम्मेवार प्रवृत्ति हो ।”
यस्तै अर्को व्यापारीले भने, “दशैंमा लामो समयसम्म बन्द हुने डरले हामीले सामान ल्याउने तालिका मिलाएका थियौं । तर सूचना अनुसार काम हुने अपेक्षा गर्दा महानवमीमै कार्यालय बन्द भएपछि ठूलो समस्या भएको छ ।”
यस विषयमा भन्सार विभागको आधिकारिक प्रतिक्रिया अझै आएको छैन । तर, सेवाग्राहीहरू भने सार्वजनिक सूचनाअनुसार नै कार्यालय सञ्चालन गर्नुपर्ने माग गर्दै अनियमितता अन्त्य गर्न सरोकारवालाको ध्यानाकर्षण गराएका छन् ।
