भोली फागुन २१ गते बिहीबार हुने प्रतिनिधिसभा सदस्य निर्वाचनलाई लक्षित गर्दै गृह मन्त्रालयले देशभर सुरक्षा व्यवस्थासहित सम्पूर्ण तयारी पूरा भएको जनाएको छ। मतदानको एक दिनअघि मन्त्रालयले ७७ वटै जिल्लाका प्रमुख जिल्ला अधिकारीहरुसँग भर्चुअल बैठक गरी निर्वाचन सुरक्षादेखि व्यवस्थापकीय तयारीसम्मको अवस्थाबारे समीक्षा गरेको हो।
गृह मन्त्रालयका सचिव राजकुमार श्रेष्ठको अध्यक्षतामा बसेको बैठकमा मन्त्रालयका उच्च अधिकारी तथा देशभरका प्रमुख जिल्ला अधिकारीहरुको सहभागिता रहेको थियो। करिब तीन घण्टा चलेको बैठकमा जिल्लागत तयारी, सुरक्षा रणनीति, संवेदनशील क्षेत्रको अवस्था तथा केन्द्रबाट आवश्यक समन्वयका विषयमा विस्तृत छलफल गरिएको मन्त्रालयले जनाएको छ।
मन्त्रालयका सह–प्रवक्ता रमा आचार्यका अनुसार बैठकमा सबै जिल्लाबाट निर्वाचनका लागि आवश्यक सम्पूर्ण तयारी पूरा भएको जानकारी गराइएको छ। मतदान केन्द्रहरूमा कर्मचारी, सुरक्षाकर्मी र निर्वाचन सामग्री सुरक्षित रूपमा पुर्याइसकिएको र शान्ति सुरक्षाको अवस्था सामान्य रहेको विवरण प्रमुख जिल्ला अधिकारीहरूले प्रस्तुत गरेका छन्।
बैठकमा विशेषगरी निर्वाचनको दिन अपनाउनुपर्ने सतर्कता, सम्भावित सुरक्षा चुनौती, संवेदनशील तथा अति संवेदनशील मतदान केन्द्रमा थप निगरानी, र आकस्मिक परिस्थितिको सामना गर्न तयार रणनीतिबारे समीक्षा गरिएको थियो। गृहसचिव श्रेष्ठले निर्वाचन सुरक्षालाई अझ मजबुत र प्रभावकारी बनाउन आवश्यक निर्देशन दिएका छन्। उनले कुनै पनि किसिमको अवाञ्छित गतिविधि हुन नदिन सुरक्षा संयन्त्रलाई उच्च सतर्कतामा राख्न आग्रह गरेका छन्।
मन्त्रालयका अनुसार मतदान शान्तिपूर्ण, निष्पक्ष र भयरहित वातावरणमा सम्पन्न गराउन नेपाल प्रहरी, सशस्त्र प्रहरी बल, नेपाली सेना तथा राष्ट्रिय अनुसन्धान विभागबीच समन्वयात्मक रूपमा सुरक्षा योजना कार्यान्वयनमा ल्याइएको छ। जिल्लागत सुरक्षा अवस्थाको निरन्तर अनुगमन भइरहेको र आवश्यक परे तत्काल केन्द्रबाट सहयोग उपलब्ध गराइने पनि स्पष्ट पारिएको छ।
बैठकमा जिल्लाहरूले आफ्नो तयारी अवस्था, मतदान केन्द्रको सुरक्षा व्यवस्थापन, सञ्चार तथा यातायात समन्वय, आकस्मिक उद्धार योजना, स्वास्थ्य आपतकालीन तयारीलगायत विषयमा जानकारी गराएका थिए। कतिपय जिल्लामा भौगोलिक कठिनाइ र मौसमीय चुनौतीलाई ध्यानमा राखी वैकल्पिक योजना तयार गरिएको समेत उल्लेख गरिएको छ।
गृह मन्त्रालयले मतदानको दिन कुनै पनि प्रकारको उक्साहट, अफवाह, सामाजिक सञ्जालमार्फत फैलाइने भ्रामक सूचना तथा निर्वाचन बिथोल्ने प्रयासलाई कडाइका साथ नियन्त्रण गरिने चेतावनी दिएको छ। संवेदनशील क्षेत्रमा गस्ती, निगरानी र चेकजाँच बढाइएको छ भने सीमावर्ती क्षेत्रहरूमा पनि सुरक्षा सतर्कता कायम राखिएको छ।
प्रमुख जिल्ला अधिकारीहरूले जिल्लामा राजनीतिक दल, उम्मेदवार, सुरक्षा निकाय तथा निर्वाचन कर्मचारीबीच समन्वय प्रभावकारी रहेको जानकारी दिएका छन्। मतदातालाई निर्धक्क भएर मतदान गर्न आह्वान गर्दै स्थानीय प्रशासनले शान्ति सुरक्षामा कुनै कमी हुन नदिने प्रतिबद्धता व्यक्त गरेको छ।
गृह मन्त्रालयले निर्वाचन प्रक्रियामा संलग्न सबै पक्षलाई आचारसंहिता पालना गर्न र लोकतान्त्रिक अभ्यासलाई सफल बनाउन सहयोग गर्न आग्रह गरेको छ। मतदानको दिन अप्रिय घटना हुन नदिन सबै सुरक्षा संयन्त्र चौकन्ना अवस्थामा रहने र प्रत्येक घटनाको तुरुन्त प्रतिक्रिया संयन्त्र सक्रिय राखिने मन्त्रालयले जनाएको छ।
यसैबीच, केन्द्रले जिल्लागत अवस्थाको निरन्तर समीक्षा गर्दै आवश्यक निर्देशन र सहजीकरण जारी राख्ने स्पष्ट पारेको छ। निर्वाचनको निष्पक्षता र विश्वसनीयता कायम राख्दै शान्तिपूर्ण रूपमा मतदान सम्पन्न गराउने लक्ष्यसहित गृह प्रशासन पूर्ण तयारीका साथ मैदानमा उत्रिएको दाबी गरिएको छ।
अब सबैको ध्यान बिहीबार हुने मतदान प्रक्रियातर्फ केन्द्रित छ। गृह मन्त्रालयले मतदातालाई ढुक्क भएर मतदान केन्द्रमा उपस्थित भई आफ्नो मताधिकार प्रयोग गर्न आग्रह गर्दै लोकतन्त्रको महत्त्वपूर्ण अभ्यासलाई सफल बनाउन आह्वान गरेको छ।
