वीरगन्जमा सामाजिक सद्भाव र्यालीठूलो जनसहभागितापर्सा — धार्मिक सहिष्णुताका लागि सोमबार वीरगन्जमा बृहत् सद्भाव र्याली निकालिएको छ । वीरगन्ज महानगरपालिकाको आयोजनामा आदर्शनगरस्थित स्विमिङ पुलबाट सुरु भएको र्याली बजार परिक्रमापछि जिल्ला प्रशासन कार्यालय पर्सामा पुगेर कोणसभामा परिणत भएको थियो ।सदियौंदेखि एकताबद्ध भएर बसी आएका वीरगन्जबासीलाई विभाजित गर्ने मनसायका साथ केही तत्व सक्रिय भएको भन्दै वीरगन्जमा बृहत् सद्भाव र्याली निकालिएको हो ।र्याली आयोजना गर्ने सम्बन्धमा आइतबार जिल्ला प्रशासन कार्यालयमा बसेको सर्वपक्षीय बैठकबाट निर्णय गरिएको थियो । कोणसभालाई सम्बोधन गर्दै संघीय सांसद प्रदीप यादवले सामाजिक सद्भावलाई कायम राख्नु पर्नेमा जोड दिएका थिए । उनले धार्मिक सहिष्णुताको भाव जागृत गरेर जात, धर्म र अन्य कारणले समाजलाई भाड्ने काम कसैले गर्न नहुने बताए ।वीरगन्ज महानगरपालिकाका प्रमुख राजेशमान सिंहले धर्मकै नाममा विभेद गरेर समाजमा कलह र हिंसा पैदा गर्न खोज्नेसँग वीरगन्जबासी सावधान छन् भन्ने सन्देश प्रवाहका र्याली निकालिएको बताए ।नेकपा एमाले पर्साका संयोजक विश्वम्भर शर्माले समुदायलाई उक्साहटमा ल्याएर सद्भाव बिगार्ने र शान्ति प्रक्रियामा खलल गर्नेलाई कानुनको दायराभित्र ल्याई कारबाही गरिनु पर्ने बताए ।पर्साका सहायक प्रमुख जिल्ला अधिकारी शिवप्रसाद लम्सालमार्फत गृहमन्त्रीलाई ज्ञापन पत्रसमेत बुझाइएको थियो । ज्ञापनपत्र बुझ्दै सहायक प्रमुख जिल्ला अधिकारी लम्सालले धर्म निरपेक्ष राष्ट्रमा कसैले पनि कसैलाई जबरजस्ती गर्न नहुने बताउँदै सद्भाव बिगार्ने तत्वलाई कारबाही गर्नुपर्ने बताए ।र्यालीमा वीरगन्ज महानगरका उपमेयर इम्तियाज आलम, जिल्ला समन्वय समिति पर्साका प्रमुख निरन्जन साह सोनार, नेकपा एकीकृत समाजवादी पार्टी पर्साका अध्यक्ष बालगोपाल थापा, नेकपा एमालेका नेता जालिम मिया, जनमत पार्टीका नेता शशिकपुर मियालगायत ठूलो जनसहभागितासमेत रहेको थियो ।
