८ वर्षपछि खुल्यो सर्वसाधारणका लागि तातोपानी नाकातातोपानी,सिन्धुपाल्चोक — आठ वर्ष पाँच महिनापछि सर्वसाधारणका लागि उत्तरी तातोपानी नाका शुक्रबारदेखि खुला गरिएको छ । भोटेकोशी गाउँपालिका–२ बाट चीन जोड्ने नाकाबाट सीमा क्षेत्र भाेटेकाेशीका ३० जना स्थानीयलाई चिनियाँ क्षेत्र प्रवेश गराएर मानव आवतजावत गराउँदै आज बिहान नाकाको उद्घाटन गरिएको हो ।अध्यागमन कार्यालय कोदारीका अनुसार चिनियाँ क्षेत्र प्रवेशका लागि अध्यागमन कार्यालय काेदारीले शुक्रबारसम्म २ सय २७ निलाे रंगको पास जारी गरेको छ । जुन पास सीमाबाट ३० किलोमिटर क्षेत्रभित्रका सिन्धुपाल्चोकबासी मितेरी पुल पारीका क्षेत्रमा जान पाउने प्रमुख जिल्ला अधिकारी रमेश न्यौपानेले बताए । ‘सुरुमा ३० जना र अहिले पास जारी भएका २ सय २७ नेपाली चिनियाँ क्षेत्र प्रवेश गरेका छन् ,’ उनले भने ।लामाे समयपछि चिनियाँ क्षेत्र प्रवेश गर्न पाएपछि स्थानीय हर्षित देखिएका छन् । खासा व्यापारमा मात्रै निर्भर सीमाबासीलाई चिनियाँ क्षेत्र लिपिङपारी १५ वटा, रमिते र खासामा ५ वटा पसल सञ्चालन गरिएकाे छ ।स्थानीयले ती पसलमा गएर कपडा र घरायसी सामान किन्न पाउँछन् ।’आउजाउ भर्खर सुरु भएको छ । त्यसैले कम मानिसलाई प्रवेश अनुमति दिएका छौं ,खासाकाे छिट्टै सम्पन्न हुने पुनर्निर्माणपछि नेपाली पर्यटक लिपिङबाट सिधै न्यालम जान पाउने व्यवस्था गरिने छ,’ अध्यागमन कार्यालयका प्रमुख रविन्द्र पोखरेलले भने । सीमाबाट ३० किलोमिटर दुरीमा हिमाली बजार न्यालम रहेकाे छ ।यसअघि १५ जेठ २०७६ मा आयात र गएको वैशाख १८ देखि यो नाकाबाट निर्यात खुला भएको थियाे । नेपाल-चीनका अधिकारीबीच नाका सञ्चालनका लागि ल्हासा, काठमाडौं र सीमाना लिपिङमा चरणबद्ध बैठक भएका थिए । भूकम्प र बाढीपहिरोले सीमा पुग्ने काेदारी राजमार्ग जीर्ण छ । काेराेना महामारीले लगभग तीन वर्ष आयात पनि अनियमित बनेकाे थियाे । सराेकारवाला सबैले तातोपानीबाट तिब्बतको कैलाशमान सराेवर जान पनि नेपाल सरकारमार्फत चीन सरकारसँग कूटनीतिक संवाद जारी राखेका छन् । प्रधानमन्त्री पुष्पकमल दाहालले असाेज पहिलाे सातामा गर्ने चीन भ्रमणमा यसबारे कुरा हुने विश्वास गरिएको छ ।साभार।
