मेजर विमल पण्डित अझै बेपत्तानेपाली सेनाको डोल्पाको दुनैस्थित नन्दबक्स गणअन्तर्गत रहेको दुनै ब्यारेक, भदालेमा खटिएका सेनानी विमल पण्डित आइतवार साँझदेखि बेपत्ता छन् । सोमबारदेखि सेना, प्रहरी र स्थानीयले खोज्दा पनि मेजर फेला परेका छैनन् । आइतबार उनी ब्यारेकबाट निस्केपछि सदरमुकाम दुनैको एटीएमबाट पैसा झिकेर भाडाको गाडीमा त्रिपुरासुन्दरी गएको बताइएको थियो । यता प्रहरीझैँ सेनाले पनि चारै तर्फबाट खोजीकार्य तीब्र पारेको छ । डोल्पा,रुकुम,जाजरकोट, कालिकोट,जुम्लाबाट सम्भावित ठाउँमा खोजी भएको छ । मेजर खोज्न गएको टोलीले महिलाको बेवारिसे लास फेला पारेको छ । माथिल्लो भेरीको किनारमा लाश फेला परेको हो ।मेजर पण्डितको खोजीमा तीनवटै सुरक्षा निकायबाट टोली परिचालित भए पनि हालसम्म फेला पर्न नसकेपछि सुरक्षाकर्मीको संख्या र खोजीको दायरा बढाउने तयारी भइरहेको प्रमुख जिल्ला अधिकारी पोख्रेलले बताए।‘उहाँ (मेजर पण्डित) को खोजी निरन्तर भइरहेको छ। तीनवटै सुरक्षा निकायबाट खोजीका लागि सुरक्षाकर्मी खटिएका छन्,’ प्रमुुख जिल्ला अधिकारी पोख्रेलले पर्दाफाससँग भने, ‘अहिलेसम्म कुनै प्रगति भएको छैन।’प्रमुख जिल्ला अधिकारी पोख्रेलका अनुसार मेजर पण्डितको जाजरकोटसम्म खोजी भएको थियो।यस्तै जिल्ला प्रहरी कार्यालय डोल्पाका प्रमुख प्रहरी नायब उपरीक्षक (डीएसपी) शिव बुढाथोकीले मेजर पण्डितको खोजीमा सेनासहित आफूहरू फिल्डमा गएको बताए। प्रहरीका अनुसार उनले सो दिन मोबाइल बैंकिङबाट पैसाको कारोबार तथा परिवारसँग फोन सम्पर्क गरेको देखिएको छ।सोही दिनदेखि हालसम्म उनको मोबाइलको स्वीच अफ छ।उनी त्रिपुराबाट हराएकाले त्रिपुरासुन्दरी नगरपालिका क्षेत्र, भेरी नदी किनारतिर खोजी केन्द्रित गरिएको प्रहरीले जनाएको छ। मेजर पण्डितले लामो समयदेखि साइकियाट्रिकको औषधि सेवन गर्दै आएका र मापसे पनि राम्रैसँग गर्ने अधिकृतमा पर्छन् ।ब्यारेकबाट निस्किएका पण्डितले त्यसअघि काठमाडौँमा रहेकी श्रीमतीसँग फोनमा कुराकानी गरेका थिए ।