सल्लाह नै नगरी कोशी सरकारको मन्त्रिपरिषद्मा एमालेलाई छिराएको भन्दै देउवा रुष्टकोशी प्रदेशका नवनियुक्त मुख्यमन्त्री केदार कार्कीले सल्लाह नै नगरी मन्त्रिपरिषद्मा एमालेलाई सहभागी गराएको भन्दै कांग्रेस सभापति शेरबहादुर देउवा रुष्ट भएका छन् ।आफ्नै निवास धुम्बाराहीमा आज पार्टीका उपसभापति र महामन्त्रीहरुसँग छलफल गरेका सभापति देउवाले कोशीका नवनियुक्त मुख्यमन्त्री कार्कीले गरेको मन्त्रिपरिषद् विस्तारप्रति असन्तुष्टि जनाएका हुन् ।देउवाले गठबन्धनले नै समर्थन गर्ने बताइरहेका बेला कार्कीले मन्त्रिपरिषद्मा एमालेलाई समावेश गरेर पार्टीको निर्णय र पद्धतिको अवज्ञा गरेको बताएको बैठकमा सहभागी एक नेताले जानकारी दिए । कार्कीले गल्ती नसच्याए विश्वासको मत दिने विषयमा पनि सोच्नुपर्ने देउवाको भनाइ थियो । सहभागी अन्य पदाधिकारीले भने छलफलबाट समाधान निकाल्नुपर्ने बताएका थिए ।कोशी प्रदेशका मुख्यमन्त्री कार्कीले बुधबार प्रदेशसभामा विश्वासको मत लिँदै छन् । तर, कांग्रेस भने विश्वासको मत दिने नदिने विषयमा अनिर्णीत छ । भोलि पुनः बस्ने पदाधिकारीको बैठकमा छलफल हुने महामन्त्री विश्वप्रकाश शर्माले जानकारी दिए ।
