मुगु । मुगुको छायानाथ रारा नगरपालिका ६, मन्दु गाउँमा चार जनाको मृत्युबारे थप अनुसन्धान गर्न प्रहरी टोली घटनास्थल पुगेको छ । घरमै हिजो (शुक्रबार) २६ वर्षीया श्रीदेवी बोहोरा, उनका ११ वर्षीय छोरा मनोज, ८ महिनाका अर्का छोरा रहर र ७ वर्षीया छोरी अप्सराको शव भेटिएको थियो ।
घटनाबारे र त्यसमा संलग्न दोषीबारे थप अनुसन्धान गर्न कर्णाली प्रदेश प्रहरीको विशेष टोली घटनास्थल पुगेको हो । कर्णाली प्रदेश प्रहरी कार्यालयका प्रमुख (डीआईजी) भीम ढकालका अनुसार घटनाबारे अनुसन्धान गर्न जुम्लाबाट एक र सुर्खेतबाट दुईवटा टोली खटिएका छन् । जसमध्ये एउटा टोली घटनास्थलमै पुगिसकेको र अरु दुई टोली पुग्दै छ ।
मृतक श्रीदेवी छोराछोरीसहित ७ गते बिहान दसैंको टीका थाप्न सोही वडामा रहेको माइती गाउँ कोटिल्ला गएकी थिइन् । ८ गते बेलुका घर फर्केका उनीहरूको सोही राति हत्या भएको हुन सक्ने प्रहरीले प्रारम्भिक अनुमान गरेको छ ।
