आइजिपी थापाको कल्याणकारी शुरूवात:-

नेपाल प्रहरीको ३१ औं महानिरीक्षकको रूपमा पदस्थापना भएको पहिलो दिनमा नै महानिरीक्षक दीपक थापाले कल्याणकारी कामबाट आफ्नो कार्य शुरूवात गरेका छन् । विभिन्न पदमा कर्मचारी प्रशासन , आर्थिक प्रशासन , प्रवन्ध निर्देशनालय देखि प्रशासन विभागमा बसेर प्रहरी मुख्यालयको तथ्यगत वास्तविकता थाहा पाएका महानिरीक्षक थापाले कल्याणकारी कोषको पारदर्शिता र बहालवाला देखि अवकाश प्राप्त प्रहरीलाई कसरी सुबिधा दिन सकिन्छ भन्ने बुझेका रहेछन् भन्ने कुरा उनको यो निर्णयले पनि देखाउंछ । भुपू प्रहरीलाई प्रहरी अस्पतालमा उपचार गराउंदा पाउने छुट सम्बन्धि केही महिना अघिको निर्णयमा थापाको ठूलो योगदान रहेको पूर्व प्रहरीहरू बताउँछन् ।
नेपाल प्रहरीको कल्याण कोष संचालन कार्यविधि संशोधन गर्ने निर्णय भएको छ।प्रहरी महानिरीक्षक दिपक थापाको उपस्थितिमा मंगलबार नेपाल प्रहरी प्रधान कार्यालयमा आयोजित पोलिसि कोओर्डिनेशन कमिटि (पिसिसि) बैठकमा प्रहरी कल्याण कोष संचालन कार्यविधि संशोधन गर्ने व्यवस्था मिलाउन नेपाल प्रहरी प्रधान कार्यालय, कल्याण महाशाखालाई निर्देशन दिने निर्णय गरिएको हो।नेपाल प्रहरी कल्याण कोषबाट सकल दर्जाका प्रहरी कर्मचारीहरुलाई प्रदान गर्ने सेवा सुविधामा वृद्दि गर्ने तथा प्रदान गरिने ऋण रकममा ब्याजदर घटाउने सन्दर्भमा आवश्यक अध्ययन गर्नुका साथै प्रहरी कल्याण कोष संचालन कार्यविधि, २०८० को समयानुकुल संशोधन तथा परिमार्जन गर्नको लागि सिफारिस समिति गठन गर्न निर्देशन दिइएको छ ।
बैठकमा प्राप्त भएको राय सुझाव समेतलाई समावेश गरी प्रहरी कर्मचारीहरुको मनोवल उच्च बनाउँदै हक हित र कल्याण अभिवृद्धि हुने गरी नेपाल प्रहरी कल्याण कोषद्वारा संचालित विशेष कल्याणकारी कोष अन्तर्गत सहुलियत कर्जा कार्यक्रमलाई समय सापेक्ष वृद्धि गर्दै लैजानका लागि कर्जा प्राप्त गर्न सेवा अवधि कम्तिमा ७ वर्ष हुनुपर्ने व्यवस्थालाई ५ वर्ष, सहुलियत कर्जा ४ लाख रुपैयाँलाई वृद्धि गरि ५ लाख रुपैयाँ र किस्ता अवधि ५ वर्षलाई ७ वर्ष कायम गरी सो अनुसारको मासिक किस्ता रकम र किस्ता संख्या निर्धारण गरी प्रहरी कल्याण कोष संचालन कार्यविधि, २०८० को संशोधन गर्ने व्यवस्था मिलाउन नेपाल प्रहरी प्रधान कार्यालय, कल्याण महाशाखालाई निर्देशन दिने निर्णय गरिएको हो । प्रहरी कल्याण कोषको व्यवस्थापन एवं सञ्चालनलाई सुदृढ बनाई प्रहरी कल्याण कोषका योजना तथा कार्यक्रमलाई आवश्यकता एवं औचित्यका आधारमा प्रहरी कर्मचारीको हक, हित र कल्याण अभिवृद्धि हुने गरी प्रहरी कल्याण कोषको पारदर्शी, औचित्यपूर्ण एवं न्यायोचित परिचालन तथा व्यवस्थापन गरिनेसमेत महानिरीक्षक दिपक थापाले बताएको हो ।