चुनाव अवधिभरका लागि मादक पदार्थ बिक्री–वितरण तथा सेवनमा प्रतिबन्ध लागेको जनाइएको छ । उच्चस्तरीय निर्वाचन सुरक्षा समितिको बैठकले निर्वाचन सुरक्षा योजना अन्तर्गत मतदानको मितिभन्दा सात दिन अगाडिदेखि निर्वाचनको अन्तिम परिणाम घोषणा नभएसम्म मादक पदार्थ बिक्री-वितरण तथा सेवनमा प्रतिबन्ध लगाउने निर्णय गरेको छ ।
निर्वाचन सुरक्षा समितिको निर्णय अनुसार यही फागुन १८ गते राति १२ बजेदेखि निर्वाचन प्रचारप्रसार निषेध हुनेछ ।
फागुन २० गते राति १२ बजे देखि फागुन २१ गते साँझसम्म अतिआवश्यक सवारी साधन बाहेक अन्य सबै गाडी सञ्चालनमा रोक लगाउने भएको छ।
चुनावको दिन Domestic र International Flights सञ्चालन हुने; विमानस्थल जान आउँदा अनिवार्य रूपमा टिकट साथमा राख्नुपर्ने। चुनाव हुनुभन्दा ७२ घण्टा अघिदेखि जिल्लाका अन्तर्राष्ट्रिय सीमाहरू बन्द गर्ने व्यवस्था मिलाइने।
मतदानको लागि मतदाता नामावलीमा नाम भए परिचय खुल्ने परिचयपत्र जस्तै मतदाता परिचयपत्र-नागरिकता- राष्ट्रिय परिचयपत्र- जग्गाधनी लालपुर्जा- पासपोर्टले पनि भोट दिन मिल्ने भएको जनाइएको छ ।
निर्वाचन सुरक्षा समितिको निर्णय अनुसार यही फागुन १८ गते राति १२ बजेदेखि निर्वाचन प्रचारप्रसार निषेध हुनेछ । यस अवधिमा पालना गर्नुपर्ने निर्वाचन आचारसंहिताको पूर्ण पालना गर्न गराउन गृह मन्त्रालयले सबै जिल्लाका प्रमुख जिल्ला अधिकारी र सुरक्षा निकायहरूलाई निर्देशन दिएको छ।
सुरक्षा वस्तुस्थितिको आँकलन तथा सुरक्षा व्यवस्थासम्बन्धी मार्गदर्शन तथा सिफारिस समेतका आधारमा निर्वाचनलाई स्वच्छ, विश्वसनीय तथा भयरहित वातावरणमा सम्पन्न गर्न आवश्यक अन्य निर्णय समेत उच्चस्तरीय निर्वाचन सुरक्षा समितिको बैठकबाट भएर कार्यान्वयनमा आएको निर्वाचन आयोगले जनाएको छ ।
साथै जिल्ला आचारसंहिता अनुगमन समितिले तोकिएका व्यक्ति तथा संयन्त्रको परिचालन गरी निर्वाचन आचारसंहिता, २०८२ को दफा १७ र १८ बमोजिम निषेध गरिएका कार्यहरू हुन नदिने र कहीँ कतै भए गरेको पाइएमा प्रचलित कानुन बमोजिम तत्काल कारबाही गरी निर्वाचन आयोगमा जानकारी गराउन भनिएको छ । यही फागुन २१ गते बिहान ७ बजेदेखि मतदान सुरु हुने भएको जनाइएको छ ।
