मनकामना माध्यमिक विद्यालयमा ५००,लाई हैजाविरुद्ध खोप खुवाइयो:-

पर्सा जिल्लाका वीरगंज महानगरपालिकाले हैजा फैलिन नदिनका लागि सञ्चालन गरेको खोप अभियान अन्तर्गत मनकामना माध्यमिक विद्यालय, भगवती टोलमा मंगलबार करिब ५०० जनालाई हैजाविरुद्धको खोप खुवाइएको छ।
महानगरपालिकाको स्वास्थ्य शाखाको समन्वयमा र मनकामना माध्यमिक विद्यालयको सहकार्यमा सम्पन्न उक्त खोप अभियानमा विद्यार्थी, शिक्षक, अभिभावक तथा स्थानीय बासिन्दाहरूको उल्लेखनीय सहभागिता रहेको विद्यालय प्रशासनले जनाएको छ।
खोप कार्यक्रमका क्रममा स्वास्थ्यकर्मीहरूले हैजा रोग, त्यसको कारण, लक्षण र बच्ने उपायसम्बन्धी जनचेतनामूलक सन्देश पनि दिएका थिए। साथै विद्यालय परिसरमा सरसफाइ र स्वच्छ खानेपानीको प्रयोगमा जोड दिइएको थियो।
महानगरपालिकाका स्वास्थ्य शाखाका प्रतिनिधिहरूले हैजाको संक्रमणबाट बच्न नियमित हात धुने, उमालेको वा फिल्टर गरिएको पानी पिउने र खुला स्थानमा फोहर नगर्ने जस्ता व्यवहारिक सुधार अत्यावश्यक भएको बताएका छन्।
वीरगंज महानगरपालिकाले सहरका सबै अस्पताल, स्वास्थ्य चौकी र विद्यालयहरूमा चरणबद्ध रूपमा हैजाविरुद्ध खोप अभियान सञ्चालन गर्दै जनचेतनामूलक कार्यक्रमहरू निरन्तर जारी राखेको जनाएको छ ।